Denn woni mi ha afah sälber liebe.

Um d’Red, wo dr Charlie Chaplin a sim sibezgischte Geburtstag het ghalte, chli necher z’bringe, hani sie i d’Mundart übersetzt. Ä wunderschöne, mit Wiisheit bestückte Wägbegleiter für ds Läbe – egal, i welem Egge mä gad sälber steit ...

 

«Denn woni mi ha afah sälber liebe, hani erchennt, dass emotionale Schmärz u Leid nume Warnzeiche für mi sy, gäge mini eigeti Wahrheit z’läbe. Hüt weisi, das isch AUTHENTIZITÄT.

 

Denn woni mi ha afah sälber liebe, hani afah verstah, wie fescht dases ä Mensch cha chränke, weni ihm versueche miner Wünsche uf z’zwinge, obwohl ig eigentlech weiss, dass dr Zitpunkt nid stimmt uner nid derzue bereit isch. U das gilt ou, wenn ig sälber dä Mensch bi. Hüt sägeni däm RESCHPÄKT.

 

Denn woni mi ha afah sälber liebe, hani ufghört, mi nacheme andere Läbe z’sehne u ha gseh, dass alles um mi um, Yladig u Ufforderig zum Wachse isch gsi. Hüt sägeni däm RIIFI.

 

Denn woni mi ha afah sälber liebe, hani afah verstah, dass ig ging u bi jeder Glägeheit, zur richtige Zit am richtige Ort bi, u dass als, wo passiert, richtig isch – vo denn a, hani chöne ruhig sy. Hüt sägeni däm SÄLBSCHTVERTROUE.

 

Denn woni mi ha afah sälber liebe, hani ufghört, mi mire freie Zit z’beroube, u i ha ufghört, grossi Projekt für d’Zuekunft z’plane. Hüt machi numeno das, wo mir Spass u Fröid macht, das woni liebe u was mis Härz zum juble bringt – uf mini eigeti Art u Wiis u i mim Tempo. Hüt sägeni däm EIFACHHEIT.

 

Denn woni mi ha afah sälber liebe, hani mi vo allem befreit, was nid gsund für mi isch – vo Spiise, Mensche, Sache, Situatione u vor allem vo däm, wo mi ging wieder achezoge u mi vo mir sälber entfernt het. Am Afang hani däm ‹Gsunde Egoismus› gseit, aber hüt weis ig, das isch SÄLBSCHTLIEBI.

 

Denn woni mi ha afah sälber liebe, hani ufghört, ging wele rächt z’ha, u so hani mi sithär weniger girrt. Hüt hani erchennt, das isch BESCHEIDEHEIT.

 

Denn woni mi ha afah sälber liebe, hani mi gweigeret, witerhin i dr Vergangeheit z’läbe u mi um mini Zuekunft z’sorge. Itz läbeni numeno i däm Ougeblick, wo alls stattfindet. So läbeni hüt jede Tag ume andere u säge däm ERFÜLLIG.

 

Denn woni mi ha afah sälber liebe, hani erchennt, dass mi mis Denke cha verstöre u chrank mache. Denn woni aber ds Denke mit mim Härz ha verbunde, isches ä wärtvolle Verbündete worde. Däre Verbindig sägeni hüt HÄRZENSWIISHEIT.

 

Mir bruche üs nid witer vor Usenandersetzige, Konflikte u Problem mit üs sälber oder anderne z’fürchte. Sogar Stärne knalle ufenand, u us däm Zämeprall wärde nöii Wälte gebore.

 

Hüt weisi, DAS ISCH DS LÄBE.

 

D’Red vom Charlie Chaplin zu sim sibezgischte Geburtstag am 16. April 1959. I d’Mundart übertrage vom Jwan Reber.