Äs het ämal ä König gläbt, wo Herrscher übernes grosses Riich isch gsi. Ds Wohl vo sim Volk isch ihm sehr am Härze gläge. Är het ä sehr ä enge u weise Berater gha, wo ihm sit vielne Jahr hilfriich zur Site gstande isch. Wo dä langsam i d’Jahr isch cho, het är dr König früehzitig ufgforderet, nacheme Nachfolger z’sueche, so dass är nä no i das wichtige Amt het chöne yfüehre.
Aller, wo sech dür höchi Bildig u grosses Wüsse hi uszeichnet, sy am Hof cho vorspräche. Dr König isch beydruckt gsi vo däne weise Chöpf, sie hi mä ganz guet gfalle. U glich het ihm bi jedem öpis Usschlaggäbends gfehlt. Är isch ned überzügt gsi. Dr Berater vom König, het das Problem schnäll erchennt u het churzerhand äs Uswahlverfahre erstellt, wo jede Bürger vom Volk, isch derzue yglade gsi. Jedem Awärter isch ä Schlüsselbund, mit über hundert Schlüssle, übergäh worde. D’Ufgab isch gsi, ä grossi, mächtigi, mit Yse bschlagni Türe, uf Ahieb – bim erschte Versuech – ufztue.
Wuchene sy dür ds Land u Hunderti hi vergäbe probiert, die Türe ufztue ...
Eines Tages, het ä Reisende vo dere gheimnisvolle Türe mitübercho, wo no niemer dr passend Schlüssel heigi gfunde. Är het sech däre Ufgab o wele stelle. Är het die ydrucksvolli Türe u ds Schloss gnauschtens betrachtet. Ohni d’Schlüssle z’beachte, het är miteme yfache Griff d’Klinke ache drückt.Tür isch uf. Sie isch gar nid agspschlosse gsi.
Höchscht erfreut het dr König gseit: «Du stellsch di anere Useforderig, ohni dig la z’verwirre. Du verlahsch di nid druf, was du ghörsch, sondern vertrousch uf di Verstand u uf dis Gfüehl. Du söllsch mi nöi Berater sy.»
I d’Mundart übertrage vom Jwan Reber nachere Gschicht vo dr Gisela Rieger (© Gisela Rieger; usem Buech «Inspirationen für’s Herz»).
Kommentar schreiben