Vor langer Zit, isch im antike Athen, ä Maa – nenne mir nä Demokritos – zum weise Sokrates gjuflet u het schnuufend zu mä gseit: «Du, Sokrates, i mues dir unbedingt öpis verzelle!»
«Ä Moment!», het nä dr Weis unterbroche, «hesch du das, wo du mir wosch säge, scho dür die drü Siebli gsiblet?»
«Drü Siebli?», het dr Demokritos verwunderet gfragt.
«Ja, guete Fründ! Luegemer doch mal, öb das wo du mir wosch säge, dür die drü Siebli düre geit ... ds erschte Siebli isch d‘Wahrheit. Hesch du das, wo du mir wosch verzelle, nacheprüeft? Bisch du dir sicher, dases wahr isch?»
«Nei, äs ischmer verzellt worde...», het dr Demokritos stirnrunzelnd gmeint.
«Aha. Aber de hesches doch sicher mitem zweite Siebli prüeft. Ds zweite Siebli isch d‘Güeti. Wes nid wahr isch, was du wosch verzelle, de isches doch wenigschtens guet?»
Dr Maa het zögeret: «Hm. Nei, ganz im Gägeteil...»
«De», het nä dr Sokrates unterbroche, «bruchemer doch ono ds dritte Siebli. Isches würklech wichtig u notwendig, dass du mir verzellsch, was dig so ufregt?»
«Notwendig nid grad ... u gnau gnoh, wichtig o nid.»
«Also my Fründ», het dr Sokrates glächlet, «we das, wo du mir wetsch verzelle, wäder wahr no guet, no notwendig oder wichtig isch, so las doch lieber la sy u tue di u mi nid dermit belaschte.»
Das Gschichtli basiert ufere Erzählig vom grosse griechische Philosoph SOKRATES. I d'Mundart übertrage vom Jwan Reber.
________
Wie du die drü Siebli ir hütige Zit sinnvoll chasch ysetze, chasch no hie gnauer nacheläse. Halt eifach Studie-Scheiss! Nei, würklech:
Kommentar schreiben