Müfante.

Kenneter das Sprichwort: «Mach nid usere Mugge ä Elefant».

Aber wär brucht das no? Das isch mittlerwile scho ziemlech agstoubt u seit öppe niemer meh. Hüt seit mä ender: «Chill dini Base, Digga». Aber vilech isch das ou scho nüm agseit u nüme In. «In» seit hüt o niemer meh. Ig scho. Zwüschdüre. Old school halt.

Öb mä itz das Sprichwort mit dr Mugge u Elefant no brucht oder nid, äs isch trotzdem höchscht aktuell. Aber eifach inere andere Form. Äs isch sozsäge i sich sälber verschmolze. Da drus hets äbe «d’Müfante» gä. U vo dene komisch-verdreite Viecher, schwirre zurzit ziemlech viel ume. Find ig.

Aber was sy Müfante überhoupt? Ds Sprichwort bedütet ja, das mä ä Chlinigkeit ufbouschet u sie schlimmer darstellt als sie eigentlech isch. Müfante sy äbe genau das verchnorzete Zwüscheding. Hützutags wird so viel Unsinn ufblase u drüber quatschet oder brichtet, aber de ner glich nid richtig abgschlosse oder ufghobe. Mä macht äbe nidemal z’rächtem ä Elefant drus. Mä pumpet d’Mugge nume mit so viel Bluet, Träne oder Scheisse voll, bis sie fasch platzt – aber äbe glich nid. Äbe nume sowit, bis sie zumene Müfant mutiert. Chliner mache u abtue, tuet mä das ufblasene Ding ner aber nid. Mä lat die bemitleidenswärti Kreatur entweder la liege oder la umeflattere u kümmeret sech nüm.

Mittlerwile gits Schwärm vo Müfante. Sie verstopfe ds Netzwärk, d’News, Social Media, dr Small-Talk, dr Deep-Talk (eifach nume zäme schnurre tuet mä hüt nüm, oder mä seit mä nüm so), die zwüschemenschlechi Beziehig ... sie lege eifach viel meh lahm, als nötig wär, die Müfante.

Nid das mä dr Ur-Bedütig vom Sprichwort wieder sött na gäh u Chlinigkeite ueche blase, aber vilech sötti üsi Gsellschaft ä gsunde Filter über all die unzählige Kanäl lege. D’Mensche wärde überall mit so viel sogenanntem «Content» vollgstopft u sy so prall gfüllt dermit, wiene Mugge nacheme summerabendleche Feschtmahl bimene Zwüschehalt ufere Schweiss-füechte Huut im Schlafzimmer X-Ypsilon.

Viel Lüt wäre dankbar, wieder d’Mugge vom Elefant chöne z’unterscheide.

Dr Müfant isch äs unfertigs Unding. Öpis u nüd. Ä Spiegel vo dr Gsellschaft wo aktuell gadechli ahnigslos Besserwüsseret u sech meischtens sälber im Wäg steit. Ja, dr Müfant isch ächt kes Tier wo mues gschützt wärde. Da chöne sech Greenpeace u Peta uf anders konzentriere. Dr Müfant cha mä mit guetem Gwüsse u beschter Absicht, abschiesse oder la platze. Aber no besser wär, mä fuetteret nä nid u lat nä nid la stige ...