Isch ä Social Media Post nume moderni Höhlemalerei ... oder, werum simer sit über vierzg Jahr nüme ufem Mond gsi?

 

Dr Mensch het scho immer ds Bedürfnis gha z’kommuniziere. Scho sit dä erschte Stunde vo dr Menschheit, oder zmindscht sowit wie mir chöne zrügg luege ... oders emel meine. D’Höhlebewohner hei ihre Gschichte für d’Nachwält a d’Steiwänd gmale. Wie authentisch sy äch die Bilder umgsetzt worde? Isch ds Mammut eventuell ä Chopf grösser, u am Säbelzahntiger siner Zähn no ä Bitz lenger u spitzer zeichnet worde? Vilech het ja dr «Urrgh», oder wie sie denn hei gheisse, mit sim Kunschtwärch wele plagiere, isch aber i Würklechkeit mit dä Froue ga Beeri sammle u gar nid mit uf d’Jagd ... da derbi isch ja nüd schlimms. Aber wäris uscho, wäri ä Shitstorm vo dä «Hater» i sire Zit, definitiv physischer usgfalle.

 

Hüt simer wit wäg vo dr Höhlemalerei u überlöh zum Teil sogar d’Kunscht dr künschtleche Intelligenz. Scho itz isches nüme sicher, öbs Handarbeit oder Digital isch. Bim «Urrgh» het das no nid müesse hinderfragt wärde. Aber äs isch ä lenge Wäg gsi vo dert bis hie. Vom Fällhösli bis zur Jeans, isch derzwüsche viel passiert. Die grosse u chline Ereignis vo dr Wältgschicht sy uf Steiplatte gmeisslet oder uf Papyrus u Pergamentpapier gchritzlet worde. Wie bedacht isch mä gsi, dass alles dr Wahrheit entspricht? Mä seit ja, Gschicht wärdi vo dä Sieger gschribe. De chas äbe o sy, das Sache wägfalle oder derzue dichtet wärde. Wemer i dr Zit zrügg luege, isches dennzumal viel schwieriger gsi useszfinde, öb dr Tegscht oder Bricht ou dä Gschehnis entsproche het.

 

U när isch d’Moderni cho ... näbschtem gschribene Wort het mä mit Bild u Ton, prägendi Momente chöne feschthalte. Vo politischi Ereignis, über Sportrekorde bis zu Spielfilme. Scho gli het d’Wält nüme glängt, u die erschte Schritte ufem Mond sy wältwiit übertrage worde. «That’s one small step for a man ... » Äs git zwar o vieli Bhouptige, dass die Mondoberflächi imene gheime Studio agleit u d’Landig ufem Ärdtrabant, vom legendäre Regisseur Stanley Kubrick sig inszeniert worde. I sire Verfilmig vom Stephen King-Buech SHINING, heig är mit versteckte Botschafte d’Wahrheit vermittlet. Das mä sitem ’69 nie meh dert obe isch gsi, löst scho chli Stirnrunzle us. D’Wältruumtechnik isch ja nid schlächter worde, oder? Aber äbe, mä liest beides. Schad, bestöh Zwifel. We mä bi andere Ereignis geit ga grabe, findt mä fasch überall zwo Meinige ... vilech isch jewils öpis derzwüsche wahr?

 

Item.

 

Zit isch vergange. U vergange. Was früecher vor allem dä Fernsehteams isch vorbehalte gsi, het hüt fasch jede Mensch sälber derbi. Ä Kamera. Das het sicher scho Vorteile bracht u mä het mängs feschtghalte wo süsch nid weri möglech gsi. Dr höcher Ateil vo dene wältwiite Filmminute, isch aber sicher wenig ghaltvoll. Das isch nume ä Bhouptig. Aber we mä sech dür ds Web bewegt, isch die Vermuetig nid abwägig. Aber ig sälber weis o wie koschtbar äs Bild oder wenigi Sekunde Film, vomene Mensch chöne sy, wo nüme da isch. So entschteit äs Verhältnis vo Wärtvoll u Nonsens, wo ig nid wet wärte. Unterhaltig isch wichtig, o we sie äbe zwüschdüre nid allzu hochstehend isch ... das liegt ja wie vieles, im Oug vom Betrachter.

 

Mit dr nöie Technik isch o die künschtlechi Intelligenz immer präsenter u äbe schlauer worde. Zurzit herrscht sie, wie dr Hansdampf i allne Gasse. Gsichter vo Prominente oder Politiker wärde uf anderi Persone übertrage, u verwäsche d’Wahrnähmig vom Zueschouer. Imene Film cha das amüsant u ydrücklech sy. We Toti uf dr Liinwand technisch wieder zum Läbe erweckt wärde, stellt sech aber d’Frag, was die Verstorbene sälber dervo würde halte? Vilech füehlte sie sech geehrt oder würdes als «Grabschändig» abtue. Musikbands wo nüme zäme uf Bühni wei, oder chöi, erschaffe sogenannti Avatare vo ihrem jüngere Ich, wo als Projektion ihre Platz ynäh u vilech no jahrzähntelang nöii Generatione unterhalte. Technisch faszinierend. Us menschlicher Sicht aber irgendwie o chli bedenklech. Mängisch het öpis eifach sini Zit gha.

 

Vilech liegt ja äbe d’Magie i dr Sach, das mä gwüssi Ereignis usere Erzählig söll erläbe. Isch das nid scho sit dä erschte Lagerfüür scho immer ä grossi Gab vo dä Mensche gsi: Gschichte z’verzelle. «Jede gute Geschichte hat es verdient, ausgeschmückt zu werden.», het ou scho dr Gandalf gmeint. Aber wo zieh mir d’Grenze zwüsche Fakte u Fantasie?

 

D’Vergangeheit git immer wieder Rätsel uf. Historiker widerlege öpis, wo sit Jahre so isch agnoh worde. Historiker wärde mit anderne Hilfsmittel i naher Zuekunft die bereits widerleite Fakte vilech erneut widerlege. Üsi Gägewart wird i Zuekunft dä Wüsseschaftler wahrschinlech z’denke gä. Was hinderlöh mir überhoupt, we ging wie meh alles digital wird ... ? Mengisch schints so, als dreie mir üs im Kreis. Im Chärn blibt dr Mensch ä Jäger u Sammler, nume alls rundum veränderet sech. Vieles hilft üs u anders nid - leider heimer sälte d’Gab, das rächtzitig ds Erchenne. 

 

Ihre Zit womer technisch no nie so wit entwicklet sy gsi u d’Brichterstattig, wo d’Balance vo ganze Länder u Natione cha zum kippe bringe, no nie so präzis chönt «Live» übertrage wie itz, macht vielmals ds Gägeteil. Falschmäldige hüüfe sech. Will öper dervo profitiert, wird mit bearbeitete Ufnahme ä Bricht usegäh. Was nid passt, wird passend gmacht. Wies de genau isch, wird vom Konsument wenig hinderfragt. Dr Intervall vo News u Mäldige isch so dicht, dass vieli Mensche müed sy. Übersättiget vo Informatione. Gmäschtet wie Wiehnachtsgäns. We mä satt isch, luegt mä nüme so ufmerksam uf ds Büffet. U we dr Chopf voll isch, luegt mä nüme so gnau uf d’Wältbühni ...

 

Isch dr Höhlebewohner «Urrgh», würklech ä gwiefte Jäger gsi oder het är nume Beeri gsammlet ... isch d’Jessie würklech so hübsch oder hilft ä Filter nache ... het das dr Trump würklech so gseit oder sy das Fake-News ... mache Taylor Swift u d’Ariana Grande, näbscht dr erfolgriiche Musikkarriere tatsächlech näbebi no «Erwachsenefilme» ... ahand vom Status isch dr Mättu tatsächlech scho wieder i dä Ferie ... ?

 

Werum mache mir Mensche das? Werum schrüble mir a dr Realität? Werum verdreie mir Gschicht so lang, bis sie irgendwie passt? U für wär? Werum boue mir itz, wo mir die witentwickeltschte Mittel hätte, ar Wahrheit z’diene, so vieli Lügekonschtrukt, wo Unmuet u Unsicherheit schüre?

 

Was chame no gloube? U we mäs gloubt, was het eim überzügt?

 

Mir hei so viel erreicht u erschaffe. Klar, für söttigi Errungeschafte bruchts schlaui Chöpf u Erfindergeischt. Gottgäbeni Gabe wo üs uszeichne u mir sölle nutze. Mir sy ging no so versässe druf, d’Technik immer usgfeilter la z’wärde u die künschtlechi Intelligenz immer menschlicher, dasmer derbi vergässe, sälber als Mensche ds wachse. Mir sötte nid im Usse Türm boue, u im Inne i Höhlene huuse.

 

Mir hinderlöh üser Spure nid nume ufem Ärdbode sondern ou i üserem Bluet u dr Erinnerig ...