Ygfrore.

Ds alte Jahr packt siner siebe Sache – ganz sicher äs paar meh – u macht am nöie Platz. Äs isch äs beläbts Jahr gsi u het im Chline wie im Grosse viel bewegt. Wie immer, churz vorem Jahreswächsel, reflektiereni u gugge zrügg u chli füre ... sowit i cha – das isch zwar mengisch nume ä Naselängi. Immerhin. U so wie a jedem Silveschter, offebart sech mir ä Metapher oder äs Sinnbild, wo für ds vergangene Jahr steit. Hüt am Morge früeh, het sech das Bild bim tanke zeigt ... i Form vo Yschkrischtalle, wo sech mit vielfältige Muschter über ds Outo hei usbreitet gha. Die mit Ysch verkruschtete Tage hei sech zwar scho lenger zeigt, aber äbe nid mitere Botschaft. Hüt scho.

 

Mit allem wo so imene Jahr passiert, gits unzählegi Momente wo mä wett ufene Pousechnopf chöne drücke u chli innehalte. Verwile. Die Szene oder das Ereignis la würke. So richtig verinnerleche. Oder statt uf d‘Pouse drücke – ygfriere. So wie das eini vo dä Lieblinge vo dr Emma, d‘Schneekönigin Elsa us Frozen, mitere simple Handbewegig macht. Wie schön wäri das, we mä äs Gspräch, äs Lächle, ä Blick, ä Kuss, ä Umarmig, äs Lachflash, ä Sunneuntergang, ä Mondliechtmoment, ä einmaligi Szene, das spezielle Chribbele ... u Unzähligs meh, chönt ygfriere u imene überdimensionale Tiefchüeler ufbewahre. Jedesmal, we mä Gluscht uf öpis hätti, chönte mä ga schnöigge ... u würd sicher zwüschdüre ä Brainfreeze (Ghirnfroscht) kassiere, wills nid schnäll gnue chönt ga, dä Moment wieder z‘erläbe.

 

U de giebs aber ou ganz sicher no das Chüelfach im Chüelfach im Chüelfach ... ds hinderscht hinde, ganz unde, wo die Momente u gsehene aber unverdoute Bilder liege – die wo mä wett vergässe. Die würde gad näbe dr z‘lang glagerete Beeri-Mischig liege, wo dermasse mit Yschkrischtalle überdeckt isch, dass sie nümme im Gonfiglas sondern direkt ufem Komposcht landet.

 

Ds Läbe wartet mitere grenzelose Palette vo wunderschöne Ereignis u Ougeblicke uf. So lang wie sie gö u mäs cha gniesse, het mä glich mengisch ds Gfüehl sie sige imene Härzschlag verbi. Unschöni Momente hei ä verdräiti Tendenz – sie möge churz sy aber duure immer z‘lang.

 

Ja, sone Tiefchüeler für Ougeblicke u Momente z‘konserviere wäri öpis.

 

Ds Läbe het anderi Regle ... alles het äs Abloufdatum. Alles isch vergänglech. Irgendwenn. Ds Verfallsdatum chläbt aber nid miteme Strich-Code im Äcke oder ziert als Tattoo ds Füdli. Mir gseh nid, wenn das öpis ds End geit. Ou we mir i üsere Gsellschaft alles beschrifte, betitle, yschetze, abschetze, diagnostiziere u versueche alles sichtbar z‘mache, glingt das nume mengisch. Alles womer sälber erschaffe oder härstelle, chönemer vilech definiere ... aber ou denn überrascht zum Bispiel äs Ärdbeer-Joghurt dermit, dases no Tage nachem Abloufdatum gniessbar isch. So glingts ou Mensche ä Diagnose z‘überwinde, wo ihres Läbe het ufe Chopf gstellt u sie sogar miteme mögleche «Termin» het konfrontiert.

 

Fakt isch, das i üsere Gägewart – i däm Moment – nüd unmöglech isch ... oder besser: ALLES isch möglech!

 

Die schöne u bunte Momente, aber ou die grau gfärbte, sy wärtvoll u koschtbar. Sie mache üses Dasy zu meh als nume zunere Exischtenz ... zu üsem LÄBE. Ou we mä vieles cha mit sine Liebschte u Mitmensche teile, jedes für sich het sie eiget Wäg, sis eigete Ziel ... eigeti Momente, Abentüür u Erläbnis. Weler das wichtig sy, gspürt mä mengisch gad denn, we sie passiere ... bi anderne merkt mäs ersch speter. Mengisch leider ou z‘spät. Aber ou das isch nid für aller glich.

 

Mit üsne technische Hilfsmittel heimer zwar d‘Möglechkeit, Bilder, Videos u Tonufnahme z‘mache u ufzbewahre – das chunt amene Tiefchüeler uf sini Art scho ziemlech nach. Ds Läbe het aber kes Chüelfach. Mir chöne dr gläbt Moment – dä Ougeblick – nid ygfriere. Mir hei aber viel meh. Ä unerschöpflechi Schatzchammere wo ke Datebank u ou nid z‘gröschte Chüelfach cha mithalte ... üses wichtigschte Archiv, üsi läbigi Bibliothek ... üses Härz. Am Hirni chöne Erinnerige entschwinde ... aber ds Härz bewahrt ds Läbe uf.

 

I däm Sinn wünscheni öich im nächschte Jahr unzählegi Momente woner wettet ygfriere u derfür umso intensiver läbet. Gniessets u löt alles Schöne i öich la gheie ... u alles andere darf ou mal drnäbe.

 

Alles Liebe u Guete fürnes gsunds, glücklechs, WUNDERvolls u zfridnigs 2026!!!