Isches scho ging so gsi? Weni da use i ds Wältgschehe gugge, gruusets mi zurzit abem meischte ... oder uf jede Fall ab vielem. Ig ha sicher ä anderi Wahrnähmig als früecher. Da bin no jünger u no chli unbeschwärter gsi. Die digitali Wält het no nid soviel Ufmerksamkeit übercho wie hüt ... alles isch no chli gmächlecher gsi. Klar, dunkli Momente gits scho, sit mir Mensche uf dr Ärde wandle. Aber i dä vergange Wuche hei sech i dr öffentleche Wahrnähmig, Gschichte offebart, wo töifi Risse dür ds Fundament vo üsere Gsellschaft zieh ... oder besser gseit, die bereits bestehende, unverputzte Risse vertöife – zmindscht us mire Sicht. Näbscht tragische, fasch ungloubleche aber reale Ereignis, passiere no vieli «Halbschatte-Ereignis». I nenne die so, will mä bi däne nid cha sicher sy, was würklech alles wahr isch.
Scho sit jehär, het mä mängs als «Verschwörigstheorie» abtah. D’Ärde isch ä Schiibe. D’Mondlandig. 9/11 ... und und und. Nid z’letscht d’Corona-Pandemie het diesbezüglech Öl iz scho stattleche Verschwörigs-Füür gschüttet. Sälbscht Lüt, wo mit wenig Zwifel dr Alltag hei bestritte, sy plötzlech unsicher worde, öb da würklech alles sini Richtigkeit het gha us mit rächte Dinge zuegange isch. Natürlech isch das Ereignis ä fruchtbare Bode gsi für absurdi Theorie u het derzue gfüehrt, dass sech d’Mensche nid einig sy. Zwütracht isch grosszügig gsäit worde – mir hei no immer gnue dervo. Die Zit wo vieli Mensche het trennt, Zwifel a dr Regierig u vielem andere het gschürt, isch bis hüt nid ufgarbeitet worde. I dr Pandemie het dr Virus aller verwütscht – we nid über ds Immunsyschtem de aber sicher über d’Psyche. National Geographic het ä Bricht veröffentlecht, wo zeigt wie starch u nachhaltig, dass d’Mensche vo däre Zit sy veränderet worde. Sithär isch zwar no viel meh passiert, aber irgendwie zeichnet sech das Ereignis als Sinnbild u Mahnmal mit dr Ufschrift «AB HIE ISCH ALLES ANDERS WORDE», ab.
Mig persönlech het d’Pandemie ou töif prägt. I däre Zit isch mis eigete Läbe wie dr Martini vom James Bond düregschüttlet worde u het ä nöie Wäg ygschlage. Vilech het sech die Zit ou desdwäge mit mire witere Denkwiis verfranset ... i gseh bi vielem wo da usse louft, scho gli mal d’Fassade bröckele. Mengisch fragemi sälber, öbi scho faschechli paranoid bi. U de glich, we mä gseht was da äbe so alles abgeit, betrachteni mini Zwifel meh als gsunde Menscheverstand u nid als Paranoia ... oder zmindscht als ä Mischig us beidem. Asichtssach. «Nume wüu du nid paranoïd bisch, heisst das no lang nid, dass sie nid hinger dir här si.», singt dr Büne Huber träffend imene Patent Ochsner-Song. Hm. Was mig aber umetribt, isch under anderem d’Entwicklig vo dä Mediebrichte, wo i dä letschte Jahr u aktuell, irgendwie no ä verdreiteri Form hei agnoh. I setzemi däm Ganze eigentlich im Mass us ... aber das längt scho. Hützutags erfahrt mä ja d’News sowieso uf Social Media oder irgend inere Story vo öpperem. Drumum chunt mä nid. Nid würklech.
Um mini Gedanke, woni da wieder mal versueche i Wort z’fasse, z’verdütleche: i dä Mainstream-Medie sy vor churzem d’Begriffe «Menschefrässer» u «Usserirdischi» gfalle. Beides i däre Zit, wo d’Epsteinfiles veröffentlecht sy worde. Die sy ou no gad ersch vor nid allzu lang äbefalls als Verschwörigstheorie ghandlet worde. Obwohl die «Files» Tegschte vo Tate beschriebe, wo die töifschte Abgründ vom Mensch zeige u sogar Täter benenne, passiert nüd. Ä Grossteil vo dä Lüt überchunts zwar mit, aber schint das als «wit wäg» abzwinke. Fasch parallel zu däre Veröffentlechung, verzellt dr Ex-US-Präsident Barack Obama, vor churzem imene Podcast so im Sinne: «Usserirdische sy real ... i ha zwar no nie eine gseh ... ». Mit däre Ussag wird dä sogenannte «Schwurbler» natürlech wieder ä stattleche Chnoche zum Gnage häregworfe. Zitglich isch dr i dr Corona-Zit als Volksverhetzer verpöhnt Sänger Xavier Naidoo, ds Berlin vorem Bundestag u redt über Dämone u Menschefrässer – basierend uf äbe däne erwähnte Files, wo sy veröffentlecht worde.
Die verschwörerisch atribene Mensche sy dr Meinig, dass d’Veröffentlichung vo däne Epsteinfiles, ds Volk vo politische Handlige u Entscheide sölle ablenke ... Obamas Alien-Ussag hingäge vo dä veröffentlechte Akte. Sie gö sogar dervo us, dass mit däne Gschichte d’Tatsach verschleieret wird, das direkt vor üsne Ouge, dr Europa-Chrieg oder sogar dr dritt Wältchrieg, planet wird ... Ei Gschicht überlageret die nächschti u die nächschti, die nächschti. Wahr oder Unwahr ... Realität oder Halbschatte-Ereignis ... das spielt schlussamend gar nümme sone grossi Rolle ... mä erreicht so i jedem Fall d’Übersättigung vo dä Lüt i allne Mileus. Mir wärde dermasse vo Quark beschallt, dass mä vor luter Grundruusche gar nümme härelost. So verliert sech ou plötzlech Wichtigs im Nirwana. Dä Zuestand schliicht sech leider ou ging meh i d’Alltagsbegägnige y.
Wener bis hie heit möge läse, wetti erwähne, dass ig die Zile nid miteme Aluhüetli ufem Chopf schribe u uf all die skurrille Gschichte zeige, u säge: «Das stimmt. So isches!»
Ig lose. Ig luege. Ig lise. Das verwärteni u versueche mit all däne Fakte, Theorie, Aburditäte, Wahrheite u Unwahrheite klar z’cho u sie yzordne. Was mir vor allem z’denke git isch, dass sech all die Ereignis dermasse überlagere, so dass sech Wahr u Unwahr immer schwieriger lat la trenne. So verschwörerisch bini de hingäge, dass ig die Tatsach als puri Absicht wahrnimme. Uf Social Media hilft da natürlech d’KI ou nid ... da wärde mittlerwile Fail-Videos (so im Sinne vo Pleiten, Pech und Pannen) oder gwöhnlechi Handy-Ufnahme, KI-generiert. Überdreit-offesichtleche KI-Videos chöne amüsant u unterhaltend sy, aber i däm das mä möglechi Live-Momente künschtlech generiert, verfälscht mä ganz klar d’Realität. Das tönt itz sehr pessimistisch, aber das wüsst ihr mittlerwile sälber: gloube cha mä nümm.
Werum triggeret mi das gad ä so?
Wie wird üsi Gägewart vo Chind oder junge Lüt wahrgnoh, wo d’Entwicklig bis hie häre, nid glich hei erläbt? Klar, mä cha sä frage was sie tüecht ... aber was machts mitem Unterbewusstsy? Vilech chöne sies ja ganz guet annäh u säge gli mal wäg öppisem rächt glasse: «Das isch eh Fake.» Sie müesse sech aber näbscht däre Zit womer aller drin stecke, no mit dä Lüt mit mim Jahrgang plus-minus umeschlah ... u für die hets äbe die anderi Zit ou gä. Isches ä besseri gsi? Das wotti gar nid beurteile. Anders isch sie gsi. Ganz bestimmt. Vilech sy d’Ärdbeeri süesser gsi ... aber ou denn sy Politiker scho korrupt gsi u d’Lüt hei sech irgendwo bechriegt. Die hüt omnipräsenti, digitale Wält wo synchron u zitglich mit dr Realität passiert, gsehni – bi allne positive Aschpäkte – längerfrischtig als Nachteil. We mä bi allem mues ds Gfüehl ha, dases eh nid ächt oder wahr isch, was macht das mit üs u wie übertreit sech das i ds Läbe usserhalb vo dä Bildschirme ...?
I gseh näbe mire chline eigete Wält, die grossi, wo ging grösser wird ... will alles necher chunt ... schnäller ... schwerer ... u irgendwie härzlos. D’Begriffe «Menschefrässer» u «Usserirdischi» sy nid z’erschte Mal i dä Medie gfalle, das weis ig. Aber i üsem Hie u Itz, würke sy irgendwie bedrohlecher als ou scho – dr Wahrheitsghalt mal usblendet, sis eifach düschteri Mäldige zviel, ufene bereits stattleche Stapel «Bad News». Wie gseit, öb mä das alles als Seich, Fake oder Gschwurbel bewärtet, oder nid – Fakt isch, das i däm grosse Suppetopf namens Gsellschaft, mit vielne gruusige u schwer verdouleche Zuetate gchochet wird. So wird üs ä grossi Schale, voll gfüllt mitere ungniessbare Brüeji uftischet u erwartet, dasmerse schön artig uslöffle ...
Steits um üs Mensche würklech so schlächt? Oder sy das eifach Gschichte wo dr Verstand vo dr Masse sölle vernäble? Meh Märli als Wahrheit? Isches eifach die unstillbari Sensationsgier vom Mensch wo mittlerwile im Minutetakt mit Live-Ticker gfüetteret wird?
Im Jahr 1947 hei namhafti Physiker wie dr Albert Einstein, J. Robert Oppenheimer u Eugene Rabinowitch d’«Doomsday Clock» (Wältuntergangsuhr) iz Läbe grüeft. Dennzumal isch sie uf siebe Minute vor Mitternacht gstande. Das Gremium vo däne schlaue Chöpf, het mit däre Uhr dä Mensche symbolisch d’Gfahr vomene Atomchrieg u dr Sälbschtzerschtörig wele vor Ouge füehre. Nachem Endi vom Chalte Chrieg (1991) sie d’Zeiger uf 17 Minute vor Mitternacht gstande. Ds Gremium het i dä letschte Jahr ufgrund vo dr rasante globale Entwicklig, dr Countdown vo «Minute bis Mitternacht» uf «Sekunde» umgestellt. Ds «Bulletin of the Atomic Scientists» begründet das wäge dä Atomwaffe wo überall umestöh, wägem Klimawandel, dr KI u Biotechnologie.
D’«Doomsday Clock» isch im Januar 2026 uf 85 Sekunde vor Mitternacht gstellt worde.
Das tönt bedingt zueversichtlech. Äs isch zwar nume ä Yschetzig u ke Tatsach, macht aber glich nachdenklech. I bi vo Grund uf mit melancholische Züüg usgstattet ... das mues mä gägewärtig aber nid sy, um sech Sorge z’mache wie sech die nächschte Jahr entwickle. Vilech bruchts aber all das ... ds Tempo ... d’Vernetzig ... d’Schablonene wo über alles gleit wärde ... d’Frücht wo ging wie weniger Gschmack hei ... falschi Prophete ... Rückzug vom Gloube ... d’Wirtschaft wo sech sälber destabilisiert ... d’Digitalisierig, wo so viel Identitäte schafft, dass ds Individuum verblasst ...
... vilech bruchts genau dä Sumpf, womer drin stecke ... vilech bruchts dä Näbel wo üs d’Sicht nimmt ... vilech bruchts das Gwicht, wo uf üser Härze drückt ... vilech bruchts all das, dasmer üs uf d'Suechi mache ... u üsi Menschlechkeit wiederfinde.
Kommentar schreiben