III

Liebi Emma. Mi tüecht, äs sig gad ersch gsi, woni ä Tegscht zu dim Geburtstag ha gschribe. Zit isch äs artigs Konschtrukt ... vor allem denn, we sie im Alltag eifach so verstriicht. Tag um Tag. Wuche um Wuche. U ufzmal vergöh Jahr. Mir stecke aller irgendwie mitts drin u loufe mit. Dr Michael Ende het i sim Roman MOMO gschribe: «Die richtigi Zit lat sech nid mit dr Uhr oder mitem Kalender la mässe. All die Zit wo nid mitem Härze wahrgnoh wird, isch so verlore wie d’Farbe vom Rägeboge fürne Blinde oder ds Lied vomene Vogel fürne Toube.» Das Zitat nimmt däm vo mir empfundene Versüümnis, dass ig mit däm Tegscht nid pünktlech uf di Geburtstag bi gsi, d’Chraft. Du würdsch wahrschinlech säge: «Aues guet. Ke Panix!»

Üsi Gägewart isch ja sowieso scho ä schnällläbigi Zit, aber mir Mensche drücke mit üser beschleunigte Entwicklig no zuesätzlech uf ds Pedal. U z’mitts i die Zit bisch du gebore. So wie unzählegi anderi Chind ou. Mengisch u aktuell gad öfter, chönts eim Sorge mache, was da uf euch chline Ärdebürger i eurer Zuekunft alls zuechunt. Aber die Gedanke het mä sech scho zu allne Zite i dr Menschheitsgschicht chöne mache. I bi überzügt, jedi Zit het ihri Generation. Ou wes gad so usgseht, als heigemer gad nid alles im Griff, touche i jeder Dekade, i jedem Zitalter, Mensche uf, wo d’Wält verändere ... sigs im Grosse oder im Chline. Da ghörsch du scho itz derzue.

Im vergangene Jahr bisch du gwachse, hesch afah plappere u bisch äs richtigs Persöndli worde. Mengisch isches ä Schnappschuss mitem Handy oder ou eifach ä Ougeblick, ä Sekundebruchteil imene Moment ... u denn, gsehni ds flüchtige Ufblitze, vo däre Frou wo du einisch würsch wärde. I dim verspielte chindleche Wäse, wo mi so mengisch z’lache macht, schlummeret ou öpis töifs u riifs ... ä alti Seel, seit mä. Du gisch mir u üs, sooo viel, wo sech nume zu Teile lat i Wort la fasse. Natürlich isch das sogenannte Toddler-Chlychind-Alter ou prägt vo vielne Heruusforderige, wo mir zäme immer so guet wie möglech versueche ds meischtere. Da glingt vieles super, u ner gits Sache womer wieder müesse ä Alouf nä. Das isch normal. Mir lehre beidi vonenand. So söll das ou sy. Wieni scho bim letschte Mal ha gschribe: wichtiger als Perfektion, isch d’Liebi wo über alles gosse wird u üser Läbe dürfliesst.

Mit dir d’Wält neu z’entdecke isch spannend u wunderschön. Die Zämehäng wo du machsch, die Frage wo du stellsch, die Erkenntnis wo du zu vielem hesch, dis ageborene Timing für Humor u träffendi Sprüch, bringemi zum stuune u härzhaft lache glichermasse. Die Bilder wo du malsch, intuitiv, mit vieeel Farb, lieber mit dä Händ als mitem Pinsel u eifach druf los, fasziniere mi so fescht, will mir das sälber nümme glingt. Dini Fröid im Wasser z’plantsche ... ds Schneeflocke fah mit dr Zunge ... änand mit Schneebäll abschiesse – mit ächtem Schnee oder däne us Luft – dini Energie u dis erfrischende Gugele ... dini Löckli wo um dis hübsche u immer chli verschmitzte Gsichtli tanze ... ds Stirn a Stirn yschlafe ... dini blühendi Fantasie wo mengisch mit dire gärdete Ysicht kollidiert ... di eiget Singsang vonere bekannte oder nöie Melodie ... äs gieb no so so so vieles woni chönt ufzelle ... dis grosse Härz u dini Liebi ... dis wunderschöne Wäse ... du bisch äs riesigs Gschänk. Abem erschte Ougeblick womer hei gwüsst, dass du i üses Läbe chunsch, heimer dig gliebt ... u scho lang vorhär. Mir sy so dankbar u gsägnet, dass du bi üs bisch. I weis gar nümme, wies ohni dig het chöne sy.

Emma, mis wunderschöne u härzige Meiteli. Mi Sunneschiin. Mis grosse Glück. Mir schribe üsi Gschicht ... Site für Site ... Tag für Tag ... i jedem Moment steckt äs chlises Abentüür. I freuemi mit dir d’Wält z’erkunde u uf ds Nöie z'entdecke ... z’gseh was du gsehsch. Chum, touchemer y, i dä Alltag wo mit so viel Schönem u Spannendem ufwartet ... aber ou immer wieder mal mit graue Momente ... für die wappne mir üs ufem Rügge vom Einhorn, bewaffnet mitem rägeboge-bunte Farbtopf, Waggel-Ouge u Stärnli zum ufchläbe. Was da no alles chunt, wüssemer nid ... aber je meh dasmer Zit mitem Härze wahrnäh, schaffemer gmeinsam, unstärblechi Erinnerige.